Актывісты кампаніі “Гавары праўду” з Гародні ў рамках працы за адкрыты і публічны бюджэт звярнуліся ў Гарадзенскі аблвыканкам, каб даведацца, куды пайшлі грошы на рэстаўрацыю аднаго са старажытных помнікаў Беларусі – гарадзенскай Каложы.
Яшчэ два гады таму ў Гародні планавалі пачаць рэстаўрацыю Барысаглебскай (Каложскай) царквы. Былі зробленыя праекты, іх абмеркаванне вялося ў дзяржаўнай прэсе. Таксама для рэстаўрацыі адкрылі адмысловы рахунак. Кажа каардынатар кампаніі “Гавары Праўду” па Гродненскай вобласці Зміцер Бандарчук:
— Грошы збіралі з прадпрыемстваў, проста з грамадзян. Быў адкрыты нейкі рахунак. На люты 2011 года было назбірана больш за 100 мільёнаў па тым курсе. Пра гэта мы даведаліся з артыкула ў газеце «Вечерний Гродно». Прайшлі два гады і, дзякуй Богу, Каложу так і не «адрэстаўравалі». Але куды ў выніку пайшлі сабраныя грошы, мы ўвогуле не ведаем.
Адказ ад аддзела культуры Гарадзенскага аблвыканкама гарадзенцы будуць чакаць згодна беларускага заканадаўства на працягу 15 дзён, а далей збіраюцца пісаць ў інстанцыі вышэй.
Крыніца: Беларускае Радыё Рацыя