Ігар Грышанаў, старэйшына вёскі Стаўры Аршанскага раёну, актывіст «Гавары праўду», адмовіўся ад сваёй пасады.
Кожнаму земляку ён даслаў кароткае тлумачэньне свайго ўчынку:
«На працягу 2016 году мяне 23 разы выклікалі ў міліцыю, вінавацілі ў прысабечваньні зямлі, у самаўпраўстве і іншых парушэньнях заканадаўства. Усе „парушэньні“ зьвязаныя з тым, што я спрабаваў заступіцца за аднавяскоўцаў. У красавіку 2015 году жыхары Стаўроў чарговы раз абралі мяне старэйшынам вёскі, але Бабініцкі сельсавет іхнага рашэньня не прызнаў. Я працаваў на падставе заканадаўства аб мясцовым самакіраваньні, але цяпер зразумеў, што не хачу займаць пасаду ў дзяржаўнай сыстэме. Няхай я ня буду называцца старэйшынам, але мне нішто не перашкодзіць вырашаць праблемы землякоў, як і раней».
Вёска Стаўры — малая радзіма Ігара Грышанава: тут жыве яго старэнькая маці, тут жа ён заснаваў фэрмэрскую гаспадарку і аграсядзібу «Пуцяціна». Так родная вёска называлася да злучэньня з суседнімі Стаўрамі.
На старэйшыну спадара Грышанава абіраюць яшчэ з 2004 году. За гэты час ён дамогся, каб у вёсцы правялі вадавод, газ, зрабілі дарогу — і таму многія аднавяскоўцы вярнуліся ў хаты сваіх бацькоў.
Вяскоўцы ня раз ладзілі суботнікі па добраўпарадкаваньні, усталявалі помнік тым, хто загінуў у час Другой сусьветнай вайны.
У 2012 годзе жыхары Стаўроў напісалі зварот да Аляксандра Лукашэнкі, што ня пойдуць на выбары, пакуль дзейныя дэпутаты ня вырашаць іхнія пабытовыя праблемы.
Ігара Грышанава абвінавацілі ў самаўпраўстве і захопе зямлі, калі ён на ўласныя сродкі абсталяваў аўтобусны прыпынак — зрабіў паветку, каб людзі не чакалі транспарту пад дажджом і сьнегам.
Не ўдалося вяскоўцам абараніць ад зносу будынак клюбу, які належаў Аршанскай птушкафабрыцы. Гэта быў адзіны грамадзкі будынак на тры вёскі Бабініцкага сельсавету — Стаўры, Нарэйкава і Сьвісьцёлкі. Тут ладзілі канцэрты, сходы, сустрэчы з дэпутатамі, аршанскія лекары праводзілі прыёмы. Аднак кіраўніцтва прадпрыемства прызнала будынак аварыйным і немагчымым для далейшага выкарыстаньня. Калі вяскоўцы даведаліся пра намер зьнесьці клюб, яны зьвярнуліся да кіраўніцтва птушкафабрыкі, каб тыя перадалі ці прадалі ім будынак. Зьвярталіся ў Аршанскі райвыканкам і Віцебскі аблвыканкам, зноў пісалі ліст Аляксандру Лукашэнку. Аднак улетку 2014-га клюб зруйнавалі бульдозэрам — гэтаксама як у мінулыя гады будынак крамы і бібліятэкі.
Дзяржаўная сыстэма зрабіла людзей бяспраўнымі, лічыць Ігар Грышанаў:
«Паводле Палажэньня аб старэйшынах населеных пунктаў Бабініцкага сельсавету, зацьверджанага ў 2010 годзе, старэйшына абіраецца на сходзе жыхароў вёскі тэрмінам на 2 гады са сталых жыхароў. Старэйшына лічыцца абраным, калі за яго прагаласавала больш за палову грамадзян, прысутных на сходзе, прычым у сходзе павінны ўдзельнічаць ня менш як 25% грамадзян, якія стала пражываюць на дадзенай тэрыторыі. На апошнім сходзе было 50% вяскоўцаў, і ўсе яны аднагалосна выступілі за абраньне старэйшынам мяне. Аднак мая кандыдатура не задавальняе сельсавет, бо я лічуся там „апазыцыянэрам“. Цяпер тое самае кажуць і на вяскоўцаў: калі яны падтрымліваюць мяне, значыць, і яны — „апазыцыя“. Я дапусьціць гэтага не магу — каб праз тое, што я старэйшына, цярпелі людзі, якія мне даверыліся. Лепш я сам пакіну гэтую пасаду, але па-ранейшаму буду дапамагаць у вырашэньні праблем сваім аднавяскоўцам».
У красавіку 1991 году Ігар Грышанаў браў удзел у вядомым страйку — калі аршанцы на знак пратэсту заблякавалі чыгунку. Вылучаўся у дэпутаты ад «Гавары праўду», удзельнічаў у Форуме кампаніі ў лістападзе.
Ігар Грышанаў — стваральнік самадзейнага музэю на сваёй аграсядзібе, якая ў 2016 годзе стала пляцоўкай для выбітных культурніцкіх падзей рэгіёну. Тут, у прыватнасьці, прайшлі прэзэнтацыі кнігі «Гняздо-2» пісьменьніцы Паліны Качатковай (Сьцепаненкі) і кнігі літаратара і журналіста Зьмітра Бартосіка «Быў у пана верабейка гаварушчы…», якая выйшла ў бібліятэчнай сэрыі Свабоды.
Яго вызвалілі з ІЧУ пасля 72 гадзін затрымання, але падазраюць у злачынстве паводле артыкулу 211, частка 1 Крымінальнага кодэксу («Прысваеньне або растрата маёмасьці асобай, якой яно даверана»)
Споўнілася сорак дзён з дня смерці палітычнага і грамадскага дзеяча Алеся Шутава. Згадвае актывіст кампаніі “Гавары праўду” Ігар Грышанаў
Падчас прыватызацыі кватэр улады ўстанавілі неабгрунтавана высокую аплату за сцены.
Дзеля дэпутата Палаты прадстаўнікоў Кузьміча А.Ф. дзяцей выгналі на спартыўныя спаборніцтвы пры тэмпературы паветра -18.