Традыцыйнага фэсту беларускай аўтарскай песні на Крапівенскім полі пад Оршай — месцы знакамітай Аршанскай бітвы — сёлета не адбылося.
Прычынай таму рэгулярныя акцыі мясцовай міліцыі, якая апошнім часам на гадавіну свята ачэплівае тэрыторыю і затрымлівае ўдзельнікаў імпрэзаў.
Разам з тым, на Крапівенскае поле самастойна прыехала некалькі дзясяткаў чалавек, сярод якіх можна было заўважыць кандыдата ў дэпутаты Палаты прадстаўнікоў ад кампаніі “Гавары праўду” Канстанціна Анташкевіча, мастака Алеся Пушкіна, барда Андрэя Мельнікава.
Прысутныя ўсклалі кветкі да помніку загінуўшым змагарам за свабоду сваёй Айчыны. Прагучалі выступы і вершы.
За прысутнымі традыцыйна назіралі супрацоўнікі Аршанскага РАУС, сярод якіх былі трое падпалкоўнікаў, аднак перашкодаў удзельнікам акцыі яны не чынілі.